Baraza la Wafanyakazi VETA Makao Makuu lazinduliwa

 

Mkurugenzi Mkuu wa VETA Dkt. Pancras Bujulu amezindua Baraza la Wafanyakazi wa VETA Makao Makuu na kusisitiza uwajibikaji na mshikamano kama nguzo kuu ya mafanikio mahala pa kazi.

Akizungumza wakati wa ufunguzi wa Baraza hilo katika ofisi za VETA Makao Makuu tarehe 6 Novemba 2020, Dkt Bujulu amesema Baraza la Wafanyakazi ndilo jukwaa la kisheria la majadiliano ya pamoja kati ya viongozi na watumishi kuhusu wajibu na maslahi ya watumishi, hivyo likitumika vizuri litasaidia  kupunguza au kuondoa kabisa malalamiko ya wafanyakazi mahali pa kazi.

Aidha, amewataka viongozi wote kutoa ushirikiano mkubwa kwa watumishi wanaowaongoza na kuhakikisha masuala yote ya maendeleo na changamoto za wafanyakazi zinashughulikiwa kwa wakati ili kuleta ufanisi, tija na kudumisha nidhamu kazini na hivyo kuongeza ari ya wafanyakazi.

Dkt Bujulu amesisitiza watumishi wa VETA kuendelea kufanya kazi kwa bidii na kujituma  kwa kuwa wana mchango mkubwa katika kufikia malengo ya Serikali ya awamu ya tano ya ujenzi wa viwanda na uchumi.

Baraza la Wafanyakazi wa VETA Makao Makuu liliundwa tarehe 5 Novemba 2020, ikiwa ni sehemu ya mchakato wa Uundaji wa Mabaraza ya Wafanyakazi wa VETA.