VETA yadhamiria kufikia 50% ya udahili wa wasichana kwenye vyuo vyake

 

Mamlaka ya Elimu na Mafunzo ya Ufundi Stadi (VETA) imedhamiria kutoa kipaumbele kikubwa katika kudahili wasichana  wanaoomba kujiunga na mafunzo ya ufundi stadi katika vyuo vyake, ili kukuza uwiano wa kijinsia na kufikia shabaha ya 50% ya udahili wa wasichana.

Azma hiyo imetolewa na Mkurugenzi Mkuu wa VETA, CPA, Anthony Kasore,  tarehe 19 Novemba 2024, wakati wa kuhitimisha zoezi la uchaguzi wa wanafunzi walioomba kujiunga na mafunzo ya ufundi stadi katika vyuo vya VETA kwa mwaka wa masomo unaoanzia Januari 2025.

Katika kikao hicho cha siku mbili, kilichofanyika katika Chuo cha VETA Dodoma na kuwahusisha wasajili kutoka vyuo vyote vya VETA nchini, CPA Kasore amesema azma hiyo pia itasaidia kuleta hamasa kwa wasichana na wanawake kwa ujumla kujiunga na mafunzo ya ufundi stadi,  hasa baada ya kuona mafanikio ya wahitimu wa kike.

Amesema, mwamko wa wasichana na wanawake kujiunga na mafunzo ya ufundi stadi bado uko chini kwa baadhi ya fani.

“Mathalani, fani za Uashi, Uundaji na Uungaji Vyuma, Uendeshaji Mitambo Mikubwa na Ufundi Magari, jinsia ya kike bado ni wachache sana, Kwa hiyo kuna haja ya kuweka msukumo.” amesema.

Kikao hicho cha wasajili hao kilikuwa na lengo la  kuchagua kwa pamoja wanafunzi kwa njia ya mfumo na kufanya msawazo wa wanafunzi katika vyuo vya VETA ili kuweka uwiano mzuri wa udahili katika vyuo vya VETA.

Mkurugenzi wa Mafunzo ya Ufundi Stadi VETA, Dkt. Abdallah Ngodu, amesema kupitia kikao hicho wasajili wa vyuo vya VETA wamejengewa uwezo wa kudahili wanafunzi kwa njia ya mfumo na wasajili wapya wamepata fursa ya uelewa wa namna ya kuingiza takwimu na taarifa za wanafunzi wapya kwenye mfumo.