MVTTC waaswa kujitangaza zaidi

Mkurugenzi Mkuu wa Mamlaka ya Elimu na Mafunzo ya Ufundi Stadi (VETA), CPA Anthony Kasore ameagiza uongozi wa Chuo cha Ualimu wa Ufundi Stadi Morogoro (MVTTC) kutangaza zaidi kozi zinazotolewa na chuo hicho ili kuongeza udahili.

CPA Kasore ametoa maagizo hayo tarehe 5 Desemba, 2024 alipotembelea na kukagua hali ya utoaji mafunzo katika chuo hicho.

Kasore amesema kwa sasa kuna ongezeko kubwa la uhitaji wa walimu wa kufundisha vyuo vya Ufundi Stadi hapa nchini kutokana na Serikali kuwekeza nguvu kubwa katika ujenzi vyuo vya ufundi stadi.

"Kwa sasa tuna vyuo vya VETA kila Mkoa na tunajenga vyuo katika kila wilaya… vyuo hivi vyote vitahitaji walimu wa kufundisha na chuo hiki cha MVTTC ndio chuo kinachoandaa walimu wa ufundi stadi hapa nchini," amesema CPA Kasore.

Kasore amesema kuwa chuo hicho kina programu nyingi na nyingine zinatolewa kwa masafa yaani "outreach programme", hivyo zinapaswa kutangazwa ili wananchi waweze kuzifahamu na kuzitumia.

Sambamba na hilo CPA Kasore amewahimiza MVTTC kutunza vifaa vya kufundishia vilivyopo katika chuo hicho na kuvitumia vyema katika mafunzo na uzalishaji.

Kwa upande wake Mkuu wa chuo hicho, Samweli Kaali amesema menejimenti ya MVTTC itafanyia kazi kwa makini maelekezo yote yaliyotolewa na Mkurugenzi Mkuu ili kuimarisha ufanisi wa utoaji mafunzo chuoni hapo.