VIJANA WA MKOANI SIMIYU WAHAMASIKA NA MAFUNZO YA UFUNDI STADI

Vijana wa Mkoa wa Simiyu wameonesha nia ya kujiunga na mafunzo ya ufundi stadi huku wakiamini kuwa elimu hiyo itawasaidia katika kujikwamua kimaisha na kuondokana na tatizo la ukosefu wa ajira.

Vijana hao wameeleza nia hiyo wakati walipotembelea banda la VETA katika maonesho ya wiki ya vijana yanayofanyika katika viwanja vya Sabasaba wilayani Bariadi.

Vijana hao wanaamini kuwa elimu na mafunzo ya ufundi stadi ni muhimu sana katika kuelekea nchi ya viwanda kwa kuwa viwanda vingi vidogo na vikubwa vitahitaji vijana wenye ujuzi katika kuviendesha.

Linda Noel (23) mkazi wa wilaya ya Meatu mkoani Simiyu amewataka vijana wenzake kuhakikisha wanajipatia stadi mbalimbali zitakazowasaidia kuajiriwa na kujiajiri huku akiiomba serikali kuharakisha ujenzi wa chuo cha VETA mkoani hapo.

“Nawahamasisha vijana wenzangu kujipatia stadi za ufundi ili waweze kuzitumia katika kuchangamkia fursa mbalimbali kwenye maeneo yao,” Alisema.

Naye Mkurugenzi wa Mafunzo – VETA Leah Dotto Lukindo alisema kuwa mamlaka inaendelea na juhudi mbalimbali za kupanua wigo wa utoaji elimu na mafunzo ya ufundi stadi pamoja na kuhamasisha vijana kujifunza stadi mbalimbali ili kuwa na nguvu kazi ya kutosha kuhudumia viwanda na hata kuanzisha viwanda vidogo vidogo.

Mkurugenzi huyo aliwataka wananchi, hususani vijana kutambua kuwa elimu na mafunzo ya ufundi stadi ni nyenzo muhimu katika kusukuma mbele maendeleo ya viwanda.

Mwalimu wa VETA Shinyanga Yona Mwambopa akitoa elimu juu ya uongezwaji thamani madini ya vito kwa kuyakata na kuyang`arisha wakati wananchi hao walipotembelea banda la VETA katika maonesho ya Wiki ya Vijana mkoani Simiyu. Fani ya Ukataji na Ung`arishaji wa madini ya vito inafundishwa katika chuo cha VETA Shinyanga.

Wananchi mbalimbali wakipata maelezo kuhusu elimu na mafunzo ya ufundi stadi walipotembelea banda la VETA katika maonesho ya wiki ya vijana mkoani Simiyu.

Mkurugenzi wa Mafunzo- VETA Leah Dotto Lukindo akitoa mada juu ya mchango wa Elimu na Mafunzo ya ufundi stadi katika kufikia Tanzania ya viwanda wakati wa kongamano la vijana lililofanyika mkoani Simiyu wakati wa maadhamisho ya wiki ya vijana.

Wananchi mbalimbali wakipata maelezo juu ya matumizi ya mashine ya kutambua matatizo ya gari kutoka kwa mwalimu wa fani ya Ufundi wa magari  katika Chuo cha VETA VETA Shinyanga.

Mwalimu wa fani ya saluni na mapambo kutoka chuo cha VETA Shinyanga Siana Nkya akitoa huduma kwa wananchi waliofika katika banda la VETA.