Ziara ya Kaimu Mkurugenzi Mkuu wa VETA Dr Bwire S. Ndazi katika kanda VETA Dar es Salaam

Kaimu Mkurugenzi Mkuu wa VETA Dr Bwire S. Ndazi amefanya ziara katika kanda na chuo cha VETA Dar es Salaam ambapo ametembelea karakana na kufanya mazungumzo na wafanyakazi.
Katika ziara hiyo pamoja mambo mengine Dr Bwire amesisitiza juu ya suala la usalama kwenye karakana za mafunzo.

Dr Bwire alisema ipo haja ya kuhakikisha kuwa walimu na wanafunzi wote wanapokuwa kwenye karakana wanavaa vifaa vya usalama vinavyohitajika kulingana na fani husika.

“ Tunapaswa kuhakikisha masuala ya usalama katika karakana yanazingatiwa ili wanafunzi wetu waone ni suala muhimu katika masomo yao na kuweza kujenga utamaduni huo tangu wanapoingia chuoni” Alisema Dr Bwire aliagiza uongozi na waalimu wa vyuo vya VETA kuhakikisha kuwa suala hilo linapewa uzito wa hali ya juu kwa kuwa lina umuhimu mkubwa katika utoaji wa mafunzo ya ufundi stadi na kwenye viwanda.

Alitaka uongozi wa vyuo kwa kushirikiana na waalimu kuweka utaratibu wa kuwazuia wanafunzi wasiokuwa na vifaa vya usalama kutoingia katika karakana ili kuweza kuonesha umuhimu wa suala hilo.

Aliwasisitiza wafanyakazi kujiendeleza kimasomo kupitia programu mbalimbali za mafunzo ikiwemo mafunzo ya muda mfupi na yale yanayotolewa baada ya kazi.

Mkurugenzi Mkuu pia aliwataka wafanyakazi wote kufanya kazi kwa kujituma na kwa ushirikiano huku wakitambua kuwa wanayo dhamana kubwa ya kuwatumikia watanzania kwa kuhakikisha utoaji na usimamizi bora wa elimu na mafunzo ya ufundi stadi

Awali, Kaimu Mkurugenzi wa kanda ya Dar es Salaam Winfred Camil aliwasilisha taarifa ya kanda hiyo na kuzitaja changamoto mbalimbali ikiwemo uchakavu wa karakana na kujengea uwezo waalimu ili kuboresha utoaji wa mafunzo kwa kuzingatia mabadiliko ya teknolojia.

Katika kuhakikisha uboreshaji wa utoaji mafunzo, Kaimu mkurugenzi Mkuu alionesha umuhimu wa VETA kupitia kanda na vyuo vyake kutengeneza mashirikiano zaidi na viwanda ili kuwa na uelewa wa teknolojia mbalimbali zinatotumika na hatimaye kuandaa nguvu kazi mahiri itakayokidhi mahitaji ya soko la ajira