Bodi Mpya ya Taifa ya Elimu na Mafunzo ya Ufundi Stadi Yadhamiria Kuboresha Utoaji wa Mafunzo Nchini

Bodi ya Nane ya Elimu na Mafunzo ya Ufundi Stadi (VET Board) imedhamiria kuongeza nguvu katika kuboresha na kupanua wigo wa utoaji Mafunzo ya Ufundi Stadi nchini.

Mwenyekiti wa Bodi hiyo Ndg. Peter Maduki, aliyeteuliwa kwa mara ya pili kuongoza Bodi hiyo, anasema kuwa Bodi hiyo imedhamiria kuhakikisha kuwa mafunzo ya ufundi stadi yanawafikia na kuwanufaisha wananchi wengi zaidi ili kuchangia katika kujenga uchumi wa nchi.

Anasema ana imani kuwa Bodi hiyo itatekeleza majukumu yake kwa ufanisi mkubwa, hasa kwa kuwa imeundwa kwa kuzingatia ushirikishwaji wa wadau wote muhimu wa mafunzo ya ufundi stadi kama vile waajiri, waajiriwa, watoa mafunzo na watunga sera.

“Waajiri watatupa mrejesho wa jinsi wahitimu wa VETA wanavyofanya kazi na kutoa mwelekeo wa aina ya mafundi stadi wanaowahitaji kwa siku zijazo na hivyo kutusaidia kuandaa mafundi stadi watakaokidhi mahitaji ya waajiri hao”. Anasema 

Ndg. Maduki anawasihi wajumbe wa Bodi hiyo kufanya kazi kwa bidii, umakini, weledi na kutumia talanta zao katika kuleta matokeo chanya zaidi kwenye elimu na mafunzo ya ufundi stadi.

Mnamo tarehe 8, Juni 2020, Waziri wa Elimu, Sayansi na Teknolojia Mh. Prof. Joyce Ndalichako, aliizindua rasmi Bodi hiyo na kuiagiza kuhakikisha mafunzo ya ufundi stadi yanawafikia Watanzania wengi zaidi ili kutatua changamoto ya ajira kwa vijana na kuchochea kasi ya uanzishwaji wa viwanda nchini.

Prof. Ndalichako alisema kuwa elimu na mafunzo ya ufundi stadi ni moja ya maeneo muhimu yanayopaswa kupewa kipaumbele na kutiliwa mkazo zaidi katika kujenga uchumi wa viwanda ili kutimiza azma ya Serikali ya Awamu ya Tano ya kujenga uchumi wa Viwanda.

Mkurugenzi Mkuu wa VETA, Dkt. Pancras Bujulu, anasema kuwa VETA inaendelea na jitihada mbalimbali za kupanua wigo wa elimu na mafunzo ya ufundi stadi ili kuyafikia makundi mbalimbali katika jamii na kuongeza ajira kwa vijana, kuongeza tija katika viwanda na kuboresha uzalishaji mali na huduma katika jamii. 

Bodi ya Nane ya Elimu na Mafunzo ya Ufundi Stadi itahudumu kwa muda wa miaka mitatu (2020 – 2023) na wajumbe wake ni Ndg. Peter Maduki (Mwenyekiti), Ndg.Ally A. Msaki (Mkurugenzi wa Ajira, Ofisi ya Waziri Mkuu Kazi, Vijana, Ajira na Watu Wenye Ulemavu); Dkt. Ethel Kasembe (Naibu Mkurugenzi wa Elimu ya Ufundi na Mafunzo ya Ufundi Stadi, Wizara ya Elimu, Sayansi na Teknolojia); Dkt. Michael Mawondo (Mwenyekiti wa RAAWU Taifa); Padre Dkt. Francis Xavier Ng’atigwa (Mjumbe kutoka Baraza la Maaskofu Tanzania) na Bi. Clotilda Timothy Ndezi (Mkurugenzi wa Programu za Maendeleo na Uhamasishaji, Jumuiya Ya Kikristo Tanzania, CCT).

Wengine ni Ndg. Nuhu Mruma (Katibu mkuu, BAKWATA); Bi. Anna Kimaro (Mtaalamu wa Sera za Mazingira ya Biashara, Shirikisho la Wenye Viwanda Tanzania, CTI); Ndg. Paul Faraj Koyi (Rais wa Chama cha wenye Viwanda, Biashara na Kilimo Tanzania, TCCIA); Bi. Leah Ulaya (Rais wa Chama cha Walimu Tanzania, CWT) na Dkt. Pancras Bujulu (Mkurugenzi Mkuu wa VETA, ambaye ni Katibu wa Bodi).

Waziri wa Elimu, Sayansi na Teknolojia Mhe. Prof. Joyce Ndalichako akiwa katika picha ya pamoja na wajumbe wa Bodi ya Nane ya Elimu na Mafunzo ya Ufundi Stadi  mara baada ya kuzindua Bodi hiyo katika hafla iliyofanyika kwenye ofisi za VETA Makao Makuu  jijini Dar es Salaam, tarehe 8 Juni, 2020.