RC Manyara, Menejimenti ya VETA waweka mkakati upanuzi chuo cha VETA Simanjiro

Mkuu wa Mkoa wa Manyara, Mhe. Charles Makongoro Nyerere, leo, tarehe 8 Februari 2023 amekutana na Menejimenti ya Mamlaka ya Elimu na Mafunzo ya Ufundi Stadi(VETA) kuweka mkakati wa upanuzi wa chuo cha ufundi stadi cha Wilaya ya Simanjiro, mkoani Manyara.

Akizungumza katika kikao kilichofanyika ofisi za VETA Makao Makuu jijini Dodoma, Mhe. Nyerere amesema upanuzi wa chuo hicho utawezesha wananchi wengi zaidi wilayani Simanjiro kupata mafunzo ya ufundi stadi.

Kikao hicho pia kiliwahusisha  Mwenyekiti wa Shirika la ECLAT Development Foundation la Mkoani Manyara, Ndg. Peter Toima Kiroya na Mwenyekiti wa Shirika la Upendo la Ujerumani Dkt. Dkt. Fred Heimbach, ambao ambao mashirika yao ndiyo yaliyoanzisha chuo Chuo Cha Ufundi Stadi cha Wilaya ya Simanjiro, kisha kukabidhi majengo ya chuo hicho kwa VETA mwaka 2019.

Mkurugenzi Mkuu wa VETA, CPA. Anthony Kasore, amesema VETA imedhamiria kwa dhati kufanya upanuzi wa chuo hicho ili kifikie viwango vilivyoweka vya vyuo vya ufundi stadi vya Wilaya ili kutoa ujuzi stahiki kwa wananchi wa Wilaya hiyo.

Amesema kazi ya upanuzi wa chuo hicho umeanza ambapo ujenzi wa bweni la wasichana, nyumba mbili za walimu pamoja na karakana mbili za mafunzo unaendelea chuoni hapo na umefikia asilimia 80.

CPA. Kasore amesema tayari Mamlaka imeshatoa fedha kiasi cha Shilingi za Kitanzania  milioni 190 kwa ajili ya kukamilisha ujenzi wa bweni la wasichana, nyumba ya walimu pamoja na karakana za ufundi umeme na ufundi bomba unaotarajiwa kukamilika ifikapo mwezi Mei, 2023.

Chuo cha VETA Simanjiro kilianza kutoa mafunzo mwaka 2019 ambapo hadi sasa kimeweza kudahili wanafunzi 82 katika fani za Uashi, Useremala pamoja na Uuungaji na Uchomeleaji Vyuma.