Ushirikiano wa vyuo na viwanda unahitaji msukumo wa Serikali, asema Kanali (Mstaafu) Simbakalia

Dar es Salaam, Desemba 2, 2024 – Imeelezwa kuwa Serikali ina jukumu muhimu katika kuimarisha ushirikiano kati ya taasisi za utafiti, elimu, na viwanda ili kujenga mfumo thabiti wa ubunifu.

Hayo yameelezwa na Kanali (mstaafu) Joseph Simbakalia  wakati akizungumza katika Mkutano na Maonyesho ya Sayansi, Teknolojia, na Ubunifu (STICE), uliofanyika katika Kituo cha Kimataifa cha Mikutano cha Julius Nyerere (JICC), Dar es Salaam, ubiasharishaji leo, Desemba 2, 2024.

Simbakalia, afisa mstaafu wa jeshi na kiongozi wa Serikali, alikuwa  akitoa mada kuu juu ya "Kurekebisha Sayansi, Teknolojia, na Ubunifu (STI) ili Kuimarisha Ushirikiano wa Viwanda kwa Mabadiliko ya Kiuchumi", ambapo amesema kuwa mafanikio ya ushirikiano huo yanahitaji juhudi za makusudi kutoka kwa Serikali ili kuimarisha uendelezaji na ubiasharishaji ubunifu.

Ameweka wazi umuhimu wa kutunga sera, sheria, na Serikali kutoa maelekezo yenye lengo la kufikia mafanikio katika uendelezaji teknolojia na ubunifu.

Aliitaja Korea Kusini kama mfano bora, ambapo maagizo ya serikali yalifanikisha uunganishaji wa sekta binafsi (viwanda) na taasisi za utafiti na elimu ili kubadilisha mawazo bunifu kuwa bidhaa zinazoweza kuingia sokoni.

"Nafikiri tuna changamoto kubwa katika ubunifu wa sera kuliko ubunifu wa bidhaa," ameongeza.

Katika mjadala, CPA Anthony Kasore, Mkurugenzi Mkuu wa Mamlaka ya Elimu na Mafunzo ya Ufundi (VETA), naye ameunga mkono maoni ya Simbakalia. 

Amesisitiza umuhimu wa sera thabiti kuimarisha uhusiano na kuboresha mawasiliano ya kimkakati na ushirikiano kati ya wadau, ikiwa ni pamoja na viwanda na jamii, ili kubaini na kushughulikia mahitaji ya ujuzi na jamii.

Kasore ametoa mfano kuhusu ubunifu  mwingi ndani ya VETA, akitaja kuwa walimu, wanafunzi, na wahitimu wake ambao wameunda teknolojia mbalimbali za kiubunifu, lakini nyingi hazijabiasharishwa kutokana  na ukosefu wa mtaji na ushiriki wa kutosha wa sekta binafsi yenye utashi wa kuzichukua na kuzalisha kwa wingi.

"Ingawa wanafunzi wetu wanaonyesha ubunifu na ufanisi wa ajabu, tunahitaji mifumo thabiti ya msaada ili kubadilisha mawazo yao kuwa mafanikio ya kibiashara," amesema.

Mkutano na Maonesho ya Sayansi, Teknolojia na Ubunifu (STICE) yanawaunganisha watafiti, wabunifu, sekta binafsi, na watunga sera, na yanaendelea kutumikia kama jukwaa la kubadilishana mawazo na kuchunguza mikakati ya kuimarisha mfumo wa ubunifu wa kitaifa. 

Washiriki walitoa wito wa hatua za kivitendo kuziba mapengo kati ya elimu, utafiti, na viwanda, kuhakikisha kwamba sayansi, teknolojia, na ubunifu vinachukua nafasi kuu katika mabadiliko ya kiuchumi ya Tanzania.

STICE 2024, inayofanyika kuanzia Desemba 2 hadi 4, inalenga kukuza mazungumzo na ushirikiano ili kushughulikia changamoto muhimu na kutumia fursa katika mfumo wa ubunifu.