VETA YANG'AA MASHINDANO YA MAMA LISHE- ZAKHIEM.

 

Mamlaka ya Elimu na Mafunzo ya Ufundi Stadi (VETA) imeibuka mshindi wa kwanza katika Mashindano ya Mama Lishe yaliyofanyika katika uwanja wa Zakhiem uliopo Mbagala, wilaya ya Temeke, jijini Dar es salaam, tarehe 4 Desemba, 2024.

VETA imewakilishwa na mshiriki Neema Andrew Mwang'ombe, mwanafunzi  wa fani ya Uandaaji Chakula, kutoka chuo cha VETA cha mkoa wa Dar es salaam, alieibuka mshindi wa kwanza dhidi ya washiriki wengine zaidi ya 250 waliojiandikisha na kuingia katika kinyang' anyiro cha mashindano hayo  yanaratibiwa na East Africa TV na Radio.

Neema amesema haikuwa rahisi kuibuka mshidi wa kwanza katika Mashindano hayo kwa kuwa ushindani ulikuwa mkubwa hasa ukizingatia kwamba yamehusisha Mama Lishe kutoka mikoa yote ya Tanzania Bara na visiwani.

"Mashindano haya yalikuwa na ushindani wa hali ya juu na kila Mama mshiriki alitamani kuwa mshindi, lakini juhudi, kumtanguliza Mungu na ujuzi nilioupata kupitia  Mafunzo ya ufundi stadi kutoka katika chuo cha VETA yamenifanya kuwa mshindi," ameongeza.

Mwalimu Euphrasia Mushi wa fani ya Uandaaji Chakula, kutoka chuo cha VETA  cha mkoa wa Dar es salaam ameongeza kuwa kumekuwa  na juhudi za hali na mali zinazofanywa na VETA katika kuhakikisha kwamba inazalisha jamii ya watu wenye Ujuzi unaohitajika katika soko la ajira.

Nae Anna Sombida, mratibu wa Mashindano hayo kutoka kituo cha runinga na redio  cha EATV amesema mashindano hayo yanalenga kumwongezea Mama lishe thamani na uwezo katika kutenda majukumu yake ya kila siku hasa kwenye eneo la chakula na lishe.

Mashindano hayo yanaingia msimu wa tano toka kuanzishwa kwake na kwa mwaka huu yamefanyika katika Wilaya 5 za mkoa wa Dar es salaam, ambapo yalianza rasmi tarehe  30 Oktoba, 2024 katika Uwanja wa Mwinjuma wilaya ya Kinondoni na baadae kuendelea  Mnada wa ndizi, Kabibo wilaya ya Ubungo, Uwanja wa Kampala relini- Gongo la mboto wilaya ya Ilala, Uwanja wa Zhakiem Mbagala wilaya ya Temeke na yanatarajiwa kuhitimishwa tarehe 11 Desemba, 2024 katika wilaya ya Kigamboni.

Mshindi wa kwanza katika Mashindano hayo amezawadiwa fedha taslimu shilingi 600,000/- kutoka Airtel, Jokufu moja kutoka Kampuni la Jedan Home Store, Kiwanja chenye ukubwa wa mita za mraba 500 kutoka Kampuni la Mwendapole, akaunti ya Imbeju na benki ya CRDB yenye amana ya kuanzia na kupata Mafunzo ya mwezi mmoja katika eneo la Mapishi kwenye chuo cha Taifa cha Utalii (NCT). 

Vilevile, mshindi atapewa nafasi ya kutangaziwa biashara yake kupitia EATV na Radio.

Mshindi wa pili amepewa Kiwanja cha mita za mraba 500, Brenda moja, kusoma mafunzo ya mapishi kwa muda wa mwezi mmoja katika chuo cha Teknolojia na Utawala

cha Kilimanjaro (KITM), Account ya Imbeju yenye amana ya kuanzia, pesa taslimu shilingi 400,000/ kutoka Airtel na mshindi wa tatu amepata shilingi 300,000/- kutoka Airtel, Jiko la sahani mbili na kiwashio chake kutoka Jaden Home Store.