CONTACT US: VETA Head Office, P.O.Box 2849 Dar es Salaam, Tanzania. E-mail: info@veta.go.tz / pr@veta.go.tz/ Telephone: +255 22 2863409 / Fax: +255 22 28 63408 / Url: www.veta.go.tz

Monday, 30 November 2020

VETA yazindua Mkataba wa Utoaji Huduma kwa Wateja, Mwongozo wa Alama za Utambulisho

Kikao cha watendaji waandamizi wa Mamlaka ya Elimu na Mafunzo ya Ufundi Stadi (VETA) kilichokuwa kikifanyika katika ofisi za VETA Makao Makuu jijini Dar es Salam jana, tarehe 29 Novemba 2020, kimehitimishwa kwa uzinduzi wa Mkataba wa Utoaji Huduma kwa Wateja (Client Service Charter) na Mwongozo wa Alama za Utambulisho wa Mamlaka (VETA Branding Guidelines).

Uzinduzi wa miongozo hiyo ulifanywa na Mkurugenzi Mkuu wa VETA, Dkt. Pancras Bujulu, ambapo Kaimu Mkurugenzi wa Rasilimali Watu na Utawala, Felix Staki na Wakurugenzi wa Kanda za VETA walikabidhiwa nakala na kutakiwa kusimamia utekelezaji wa miongozo hiyo katika maeneo yao ya kazi.

Akitoa maelezo kwa ufupi kabla ya uzinduzi, Meneja Uhusiano wa Mamlaka, Sitta Peter amesema kuwa Mkataba wa Utoaji Huduma kwa Wateja wa VETA unafafanua viwango na ubora wa huduma ambazo VETA inaahidi kuzitoa kwa wateja wake, muda utakaotumiwa na watumishi wa Mamlaka kutoa huduma hizo na majukumu na wajibu wa mteja na taasisi katika kutoa huduma hizo.

“Mkataba huu unatufungamanisha na wateja wetu. Tunapaswa kutoa huduma kwa ubora ulioanishwa kwenye Mkataba huu na katika namna inayowaridhisha wateja wetu,” amesema.

Amesema kwa ujumla mkataba huo utatumika kama kipimo mahsusi cha utendaji kazi na uwajibikaji kwa kuzingatia mahitaji ya wapokea huduma, kutokana na ukweli kuwa watumishi wote wa umma wanapaswa kuwajibika kwa umma.

Kwa upande mwingine, Peter amesema kuwa Mwongozo wa Alama za Utambulisho wa VETA (VETA Branding Guidelines) umeandaliwa ili kusaidia kuweka mfanano na viwango sawa vya mwonekano wa Mamlaka nchini kote.

Ameongeza kuwa awali kulikuwa na utofauti mwingi katika matumizi ya Alama za Mamlaka zikiwemo nembo, rangi na namna za uandaaji nyaraka na machapisho.

Kikao cha watendaji waandamizi wa VETA kilijadili mambo mbalimbali ikiwemo utekelezaji wa miradi ya ujenzi na upanuzi wa vyuo vya VETA, usimamizi wa mafunzo, hali ya rasilimali watu, mipango na usimamizi wa fedha pamoja na maandalizi ya Kongamano la Ufundi Stadi lililopangwa kufanyika Januari 2021 jijini Dodoma.

Aidha, katika kikao hicho wawezeshaji kutoka nje ya Mamlaka walitoa mada kuhusu Maadili katika Utumishi wa Umma na Utekelezaji Miradi ya Ujenzi kwa Kutumia Rasilimali za Ndani (Force Account).


Saturday, 28 November 2020

Mbunge Festo Sanga kufadhili vijana 10 kila mwaka kusoma chuo cha VETA Makete


MBUNGE wa jimbo la Makete, Festo Sanga ameahidi kufadhili vijana 10 kila mwaka kusoma katika chuo cha ufundi cha VETA Makete na kuwataka wazazi kupeleka vijana wao kwa wingi katika chuo hicho ili waweze kujifunza fani mbalimbali.

Sanga ameyasema hayo Ijumaa tarehe 27 Novemba 2020, akiwa mgeni rasmi kwenye mahafali ya sita ya Chuo cha Ufundi Stadi cha Wilaya ya Makete (VETA Makete).

Sanga alisikitishwa kuona mwamko mdogo wa wananchi wa Makete katika kujiunga na mafunzo ya ufundi stadi licha ya kusogezewa karibu huduma hiyo ya mafunzo.

"inasikitisha kuona kati ya wanafunzi 64 wanaohitimu leo, wanafunzi wanaotokea hapa Makete hawafiki 10, zaidi ya 50 wanatoka nje ya Makete, Mara, Tukuyu, Tanga, Dar es Salaam, Iringa na kwingineko. Tafsiri yake ni kushindwa kuitumia fursa hii sisi Wanamakete. Nawaomba sana tuwalete vijana wetu hapa waje wasome,” amefafanua.

Sanga amesema kuwa Serikali imewekeza mabilioni ya fedha katika chuo hicho pekee cha VETA katika mkoa wa Njombe ili wananchi wa Wilaya ya Makete waweze kunufaika na fursa za mafunzo ya ufundi stadi, hivyo akawaomba kuitumia vyema fursa hiyo.

Sambamba na hilo, Sanga ameahidi kueneza ufahamu kwa umma juu ya mafunzo yatolewayo na VETA ikiwemo ukweli kuwa gharama zake ni nafuu na kwamba Watanzania wengi wanaweza kuzimudu. 

Akiwa katika mahafali hayo, Sanga alijionea karakana na kushuhudia maonesho ya ujuzi na umahiri wa wanafunzi katika fani mbalimbali ikiwemo utengenezaji wa batiki, sabuni, uashi, ufundi seremala na ufundi wa magari.

Mahafali ya chuo cha VETA Makete ilihusisha wahitimu 64, miongoni mwao wavulana 52 na wasichana 12, katika fani za Ushonaji, Ufundi wa Magari, Useremala na Uashi.

VETA yashauriwa kutumia ajira za uhamisho kupunguza uhaba wa watumishi

Mamlaka ya Elimu na Mafunzo ya Ufundi Stadi (VETA) imeshauriwa kutumia utaratibu wa ajira za uhamisho kama moja ya njia za kupunguza changamoto ya uhaba wa watumishi unaoikabili.

Ushauri huo umetolewa na Naibu Katibu Mkuu, Ofisi ya Rais, Menejimenti ya Utumishi wa Umma na Utawala Bora, Dkt. Francis Michael, wakati akizindua Baraza Kuu na Wafanyakazi wa VETA, katika ofisi za VETA Makao Makuu, jijini Dar es Salaam, siku ya Alhamisi, tarehe 26 Novemba 2020.

Naibu Katibu Mkuu huyo alisema utaratibu mwingine ni ule wa “Ajira Mbadala” ambao hutumika kujaza nafasi za wafanyakazi waliotoka katika utumishi wa umma kwenye taasisi hiyo. Watumishi hao ni wale waliostaafu, kuhama, kuacha au kuachishwa kazi au kufariki dunia. Alisema kwamba utaratibu huu hauna mlolongo mrefu wa uidhinishaji kwa kuwa ikama katika nafasi husika zilikuwa zimeshaidhinishwa.

“Lakini pia niseme kwamba nimeichukua changamoto yenu ya uhaba wa watumishi na naahidi kuwasaidia kupata watumishi ili kupunguza nakisi ili utendaji wa Mamlaka uboreke na muweze kutayarisha mafubndi stadi mahiri na wa kutosha. Leteni, njooni tuzungumze, nina imani hatutashindwa,” alisema.

Akizungumza kabla ya kumkaribisha Naibu Katibu Mkuu, Mkurugenzi Mkuu wa VETA, Dkt. Pancras Bujulu alisema kuwa moja ya changamoto kubwa ambazo VETA inakabiliwa nazo ni uhaba wa watumishi, hasa kada ya ualimu, hali inayochangia watumishi waliopo kubeba mzigo mzito wa majukumu.

Alisema VETA ina upungufu wa watumishi 562 ambapo kati yao 396 ni walimu wa mafunzo ya ufundi stadi na 166 wa kada zingine.

“Kutokana na uhaba mkubwa wa watumishi, wale tuliopo tunabeba majukumu ambayo yangefanywa na watumishi wawili au watatu. Matokeo yake karibu kila siku tunafanya kazi mpaka usiku, wakati mwingine mpaka usiku wa manane, ili kuhakikisha majukumu ya Mamlaka yanakamilika. Tunabeba mzigo mzito na tunachoka sana,” Dkt. Bujulu alisema.

Alimuomba Naibu Katibu Mkuu na ofisi yake kwa ujumla kulitazama kwa jicho la karibu tatizo la uhaba wa watumishi ndani ya VETA na kulitafutia ufumbuzi, hasa kwa kuzingatia umuhimu wa majukumu ya Mamlaka hiyo katika uchumi wa Taifa, hususan ujenzi na uendeshaji wa viwanda nchini.

Bi. Neema Mwakalukwa, ambaye ni Mkurugenzi wa VETA Kanda ya Kusini Mashariki na Mjumbe wa Baraza Kuu la Wafanyakazi, aliiomba Ofisi ya Rais, Menejimenti ya Utumishi wa Umma na Utawala Bora, kuangalia uwezekano wa kuiruhusu VETA kuajiri wafanyakazi wa mkataba watakaosaidia kufundisha kozi za muda mfupi na kufanya kazi zingine za uzalishaji mali, kisha kulipwa kwa vyanzo vya ndani ya Mamlaka.

“Tunaingia makubaliano ya kuwalipa watu kama vibarua. Kwa hiyo hata ikitokea anakwambia kesho au keshokutwa hataweza kuja, huwezi kumzuia kwa sababu huna mkataba naye. Unajikuta umekwama. Lakini ukiwa na mkataba naye hata kama ni wa miezi sita au mwaka mmoja unakuwa na uhakika wa uwepo wake,” alisema.

Baraza Kuu la Wafanyakazi wa VETA lilifanya kikao chake Alhamisi, tarehe 26 Novemba hadi Ijumaa, tarehe 27 Novemba, 2020 na kujadili mambo mbalimbali, ikiwemo utekelezaji wa mipango ya Mamlaka kwa mwaka 2019/2020 na mipango ya Mamlaka ya mwaka 2020/2021. Taarifa hizo zilifuatiwa na mijadala ya kina, iliyohitimishwa kwa kuweka Maazimio ya kutekelezwa kwa mwaka 2020/2021.



Thursday, 26 November 2020

Wadau wa hoteli za Mtwara, Lindi wasifu mafunzo ya uanagenzi

Wadau wa hoteli na utalii katika mikoa ya Lindi na Mtwara wameusifu Mpango wa Mafunzo ya Uanagenzi Pacha (Dual Apprenticeship Training) unaoendeshwa na Mamlaka ya Elimu na Mafunzo ya Ufundi Stadi (VETA) na kusema kuwa umesaidia kwa kiasi kikubwa kuongeza tija mahala pa kazi. 

Wakizungumza wakati wa Semina Elekezi kwa Wasimamizi wa Sekta ya Hoteli na Utalii iliyoendeshwa na VETA katika ofisi ya VETA Kanda ya Kusini Mashariki iliyopo mkoani Mtwara, tarehe 16 Novemba 2020 wamiliki hao walisema mpango huo umekuwa na manufaa katika kampuni zao, kwani pia wanashiriki katika kuwafundisha wanagenzi (wanafunzi) waliopo katika mpango huo, hivyoi inasaidia kupata wafanyakazi bora.

Akichangia wakati wa semina hiyo, Meneja wa Tiffany Diamond Hotel, Nassoro Kingazi alisema mpango huo umekuwa na tija katika kuzalisha nguvukazi yenye ujuzi kwenye maeneo yao ya kazi.

Aliwaomba wamiliki wengine wa hoteli kuunga mkono mpango huo kwa kuruhusu vijana kufanya mafunzo kwa vitendo katika hoteli zao ili wawe bora na kukubalika katika soko la ajira

 “Kwangu mimi programu hii naichukulia kama uwezekaji mkubwa kwa wadau na ushirikiano mzuri kwa sababu tunakuwa na uhakika wa soko la ajira kwa wale vijana tunaokuwa tunawatengeneza na kuwaanda. Kupitia programu hii inatupa uhakika kwamba wanafunzi ambao wanakuwa wamefundishwa na vyuo vya VETA ni mtaji tosha kwetu kwa sababu tunakuwa tumewapika wenyewe na tunatambua kabisa zao hili halitapotea na ni la uhakika,” alisema.

Naye Meneja wa Naf Beach Hotel, Fadhili Mkwemba, aliishukuru VETA kwa kuanzisha Mpango huo ambao umemuwezesha kushirikiana na chuo cha VETA Mtwara katika kutoa mafunzo  kwa wanagenzi (wanafunzi).

Alisema wanagenzi hao wamekuwa mfano wa kuigwa katika idara zote nne za hoteli yake zikiwemo Mapokezi, Upishi, Usafi na Uhudumu Vyumbani na Huduma ya Chakula na Vinywaji.

Aliahidi kuwa hoteli yake itaendelea kupokea wanafunzi kutoka VETA ili wapate nafasi za mafunzo kwa vitendo ili kuwa mahiri zaidi.

Mratibu wa mpango huo, Francis Komba alisema kuwa semina hiyo imelenga kutoa majukumu kwa wasimamizi wa hoteli hizo juu ya mbinu bora za kushirikiana na wanagenzi, njia bora za kutoa mafunzo na viwango vya kuwapima uelewa wanagenzi hao hao.

Mwanagenzi kutoka Chuo cha VETA Mtwara Salma Masoud amewahimiza vijana kujiunga na mafunzo kupitia mpango wa uanagezi, kwani unasaidia kupata ujuzi  na kuweza kuajirika.

Hoteli zilizoshiriki semina juu ya mpango huo wa mafunzo ya Uanagenzi Pacha katika mikoa ya Lindi na Mtwara ni pamoja na Tiffany Diamond hotel, Naf beach hotel pamoja na VETA CCC hotel.

Baada ya semina hiyo elekezi kampuni hizo zimetoa ahadi ya kupokea wanagenzi ishirini kwa mwendelezo wa Uanagenzi Pacha kwa mwaka wa masomo 2021.



Wednesday, 25 November 2020

Wahitimu wa ufundi stadi wahamasishwa kuchangamkia fursa za mikopo kwenye halmashauri za wilaya

 


Wahitimu wa elimu na mafunzo ya ufundi stadi wamehamasishwa kujiunga katika vikundi na kuchangamkia fursa za mikopo inayotolewa katika halmashauri za wilaya nchini ili waweze kujiajiri baada ya kupata ujuzi.

Wito huo umetolewa na Kaimu Mkurugenzi Mtendaji wa Halmashauri ya Manispaa ya Morogoro, Michael Waluse kwa niaba ya Mkuu wa Mkoa wa Morogoro Mhe. Loata Ole Sanare katika mahafali ya Chuo cha VETA Kihonda, yaliyofanyika Ijumaa tarehe 20 Novemba 2020.

Amesema kila mwaka halmashauri zote nchini hutenga fedha katika bajeti zake kwa ajili ya kusaidia vijana, wanawake na watu wenye ulemavu, hivyo wahitimu wa VETA wana fursa nzuri za kunufaika na mikopo kwa kuanzisha vikundi na miradi yao.

Kwa upande mwingine, Waluse amewashauri wamiliki wa makampuni yenye magari makubwa kuwapeleka madereva wao kupata mafunzo ya umahiri kwenye chuo cha VETA Kihonda, kwani chuo hicho kimebobea sana katika kutoa mafunzo ya Udereva wa Magari Makubwa.

Mkuu wa Chuo hicho, Kashindye Maganga, amesema baada ya kubaini uhitaji wa mafunzo ya udereva wa magari makubwa na changamoto ya upatikanaji wa muda wa kuhudhuria mafunzo kwa madereva walio kazini, chuo hicho kimebuni utaratibu wa kuwafuata waliko (outreach) na kuendesha mafunzo kwenye maeneo yao.

Alisema utaratibu huo umekiwezesha chuo kufundisha madereva 1474 (wanaume 1463 na wanawake 11) katika kipindi cha kuanzia Januari 2019 hadi Novemba 2020.

Alisema kupitia mpango huo makampuni mengi yameitikia kutoa madereva wao kupata mafunzo na kuyataja baadhi ya makampuni hayo kuwa ni pamoja na World Oil, Mohamed Enterprises, GSM, Overland na TANCOAL Songea.


Mahafali hayo ilihusisha jumla ya wahitimu 241 katika fani  za Ufundi wa Zana za Kilimo, Ufundi Uashi, Ufundi wa Ushonaji Nguo  Ufundi Bomba, Ufundi Useremala, Ufundi wa Mafriji na Viyoyozi , Ufundi wa Umeme wa Majumbani, Ufundi wa Mitambo na Ukerezaji Vyuma, Ufundi wa  Magari na Ufundi wa Umeme wa Magari ambapo wahitimu  186 walikuwa ni wanaume na 55 wanawake.



Bodi ya VETA yahimiza ukamilishaji ujenzi wa vyuo vya VETA Kagera na Geita

Bodi ya Taifa ya Elimu na Mafunzo ya Ufundi Stadi imehimiza ukamilishaji haraka wa ujenzi wa vyuo vya VETA Kagera na Geita ili wananchi waanze kunufaika na mafunzo katika vyuo hivyo.

Wito huo umetolewa wakati wa ziara ya Bodi hiyo katika miradi ya ujenzi wa vyuo vya VETA Kagera, VETA Chato na VETA Geita iliyofanyika tarehe 10 hadi 12 Novemba 2020 kwa lengo la kujionea uhalisia wa miradi hiyo. 

Mwenyekiti wa Bodi hiyo, Ndugu Peter Maduki amesema Bodi yake inataka kuona kasi kubwa ya ujenzi wa vyuo vya VETA Kagera na VETA Geita ili hatimaye vikamilike na kuanza udahili mwaka 2021.

Alipongeza hatua zilizochukuliwa na Wizara ya Elimu, Sayansi na Teknolojia katika kuendeleza ujenzi wa Chuo cha VETA Geita uliokuwa umesimama kwa muda mrefu.

“Kama Bodi, tunatoa masikitiko yetu makubwa sana kwa namna ambavyo mradi umetekelezwa na kukwama kwake kwa takribani mwaka mmoja na nusu tangu ulipoanza kutekelezwa. Tunasikitika kwa sababu kubwa moja, wananchi hawawezi kupata fursa tuliyokuwa tunatarajia. Tulitarajia tungeanza kutoa mafunzo kwa wanafunzi 400 wa kozi za muda mrefu na 1000 wa kozi za muda mfupi,” amesema.

“Kama Bodi, tumetafakari jambo hili tukishirikiana na Wizara yetu ya Elimu, Sayansi na Teknolojia kuona namna gani tunaweza kufufua mradi huu. Hatua ya kwanza baada ya majadiliano tumeona mradi huu uendelee kwa fedha kutoka chanzo kingine ambacho Serikali imekitafuta na namna ya utekelezaji wake tumeona tuende kwa force account (kutumia nguvu na rasilimali za ndani) ambayo itatupunguzia gharama na itatuwezesha kukamilisha mradi huu kwa haraka zaidi,” ameongeza.

Amesema, hali ya uhitaji wa mafunzo kwa wananchi wa mikoa ya Kagera na Geita umedhihirishwa na kiwango cha maombi ya kujiunga na chuo cha VETA Chato ambapo zaidi ya vijana 300 wamewasilisha maombi ya kusoma kozi za muda mrefu zitakazoanza mwezi Januari, 2021.

Akitoa taarifa kwa Bodi kuhusu ujenzi wa vyuo hivyo kwa nyakati tofauti, Mkurugenzi Mkuu wa VETA, Dkt. Pancras Bujulu amesema kuwa mradi wa ujenzi wa Chuo cha VETA Kagera umekamilika kwa asilimia 45 na unatarajiwa kukamilika mwezi Agosti, 2021. Chuo cha Ufundi Stadi na Huduma cha Mkoa wa Kagera (VETA Kagera) kinajengwa kwa ufadhili wa Serikali ya Jamhuri ya Watu wa China kwa gharama za fedha za kitanzania sh bilioni 19.4 katika eneo la ukubwa wa hekta 40.5 katika kijiji cha Burugo wilayani Bukoba.

Dkt. Bujulu amesema Chuo hicho pindi kitakapokamilika kitakuwa na uwezo wa kuchukua wanafunzi 800 wa kozi ndefu na 2000 wa kozi fupi katika fani mbalimbali ikiwemo useremala, uchomeleaji, upakaji rangi, na ufundi bomba.

Kuhusu ujenzi wa Chuo cha VETA cha Wilaya ya Chato, Dkt. Bujulu amesema miundombinu ya utoaji mafunzo kwenye chuo hicho imekamilika ikiwemo ununuzi na usimikaji wa vifaa ambapo tayari wanafunzi 60 wameanza masomo kwa kozi za muda mfupi huku wengine 300 wakiwa wamewasilisha maombi ya kusoma kozi za muda mrefu zitakazoanza mwezi Januari 2021.

Mjumbe wa Bodi ya VETA ambaye ni Rais wa Chama cha Wafanyabiashara, Wenye Viwanda na Kilimo Tanzania (TCCIA), Ndugu Paul Koyi amesema amefurahi kuona VETA ikitoa stadi zinazolenga kuandaa wahitimu watakaoweza kuanzisha shughuli zao za kuwaingizia kipato pindi wanapohitimu.

“Nimefurahishwa sana na mafunzo yanayotolewa hasa ya uchakataji samaki…Tunaahidi kuwatafutia soko la kimataifa la samaki hao wanaondaliwa kwa ustadi wa hali ya juu,” amesema.