VETA Yawahamasisha Wenye Ulemavu Kutumia Fursa za Mafunzo ya Ufundi Stadi Kujikwamua Kimaisha

Mamlaka ya Elimu na Mafunzo ya Ufundi Stadi (VETA) imeendesha semina ya kuwajengea ufahamu jamii ya watu wenye ulemavu na kuwahamasisha kutumia fursa mbalimbali za kujipatia ujuzi katika vyuo vya ufundi Stadi nchini ili kujikwamua kimaisha.

Akifungua semina hiyo katika ofisi za VETA Makuu jijini Dar es Salaam Juni 21, 2019 Mkurugenzi Mkuu wa VETA Dkt. Pancras Bujulu amesema kuwa Mamlaka hiyo inaamini kuwa ujuzi ni nyenzo ya msingi kabisa katika kuwawezesha watu wa makundi hayo kwenda sambamba na wengine katika harakati za kiuchumi, hususani katika kipindi hiki cha harakati za kuelekea kwenye uchumi wa viwanda. 

Alisema VETA imeendelea kubuni miradi mbalimbali yenye kulenga katika kupanua wigo wa fursa za mafunzo ya ufundi stadi kwa makundi maalum katika jamii, pamoja na kuweka mazingira wezeshi kwa makundi hayo kupata mafunzo.

Dkt Bujulu aliwataka watu hao kuendelea kutumia vyema fursa zilizopo za kujipatia ujuzi katika vyuo vya VETA ili waweze kuajiriwa au kujiajiri kwa urahisi zaidi.

“Napenda nitumie fursa hii pia kuwaomba watu mbalimbali waendelee kutuunga mkono katika kuwezesha watu wa makundi maalum kupata mafunzo na ujuzi ili hatimaye waweze kuajirika na hivyo kuondokana na utegemezi katika jamii.”Aliongeza

Alisema katika Mpango Mkakati wa mwaka 2018 hadi 2023, VETA imepanga kudahili watu wenye ulemavu 400 na wenye changamoto mbalimbali za kimaisha 2,400 kila mwaka.

Mkutano huo umehusisha washiriki 60 kutoka kwenye jamii ya wasiiona, wenye ulemavu wa viungo, viziwi na wenye ualbino.

Mmoja wa washiriki wa mkutano huo Wakili Dkt. Gideon Mandesi aliiomba VETA kuanzisha dawati maalum la watu wenye ulemavu katika vyuo vyake vyote ili kuwezesha kundi hilo kuhudumiwa kwa ufahisi zaidi.

Naye mmoja wa wahitimu wa kozi ya Useremala asiyeona Ndugu Boniface Kiyenze aliwasihi watu wa jamii hiyo kujiunga na vyuo vya ufundi stadi na kujipatia ujuzi utakaowawezesha kuendesha maisha yao kama yeye alivyofanikiwa kuendesha maisha yake na familia yake.

Miongoni mwa mada zilizotolewa katika semina hiyo ni Fursa za Elimu na Mafunzo ya Ufundi Stadi;  Stadi za Ujasiriamali na Programu ya Mafunzo ya Kukuza Ujasiriamali katika Sekta isiyo Rasmi.

Semina hiyo imetolewa kama sehemu ya Maadhimisho ya Wiki ya Utumishi wa Umma yanayofanyika kitaifa kuanzia tarehe 16 hadi 23 Juni, 2019.