Fainali za Mashindano ya Sayansi, Teknolojia na Ubunifu zafunguliwa jijini Dodoma

Naibu Waziri wa Elimu Sayansi na Teknolojia, Mheshimiwa William Tate Olenasha, leo tarehe 5 Machi 2019, amefungua rasmi mashindano ya sayansi, teknolojia na ubunifu ngazi ya kitaifa katika viwanja vya Kumbukumbu ya Nyerere (Nyerere Square) jijini Dodoma, huku akiwataka wadau mbalimbali kushirikiana na serikali katika kuhamasisha harakati za sayansi, teknolojia na ubunifu ili kuongeza mchango katika maendeleo ya kiuchumi na kijamii.

Mashindano ya mwaka huu yanaongozwa na kaulimbiu, “Kukuza Ujuzi na Ubunifu kwa Uchumi wa Viwanda,” na yamehusisha makundi mbalimbali ya wabunifu na wadau wa sayansi, teknolojia na ubunifu katika maeneo na nyanja mbalimbali nchini kote.

Mheshimiwa Ole Nasha amepongeza utaratibu wa kuanzisha mashindano ya Kitaifa ya Sayansi, Teknolojia na Ubunifu, akisema kuwa utaratibu wa kuwabaini na kuwashindanisha wabunifu ni miongoni mwa mambo yanayoweza kuchangia kwa kiasi kikubwa katika kuhamasisha na kuleta mwamko zaidi ili kuibua na kuendeleza teknolojia na ubunifu miongoni mwa Wananchi. 

“Hivyo, ni vyema tukaweka mipango na mikakati ya kudumisha utaratibu huu wa kuwa na Mashindano ya Kitaifa ya Sayansi, Teknolojia na Ubunifu kila mwaka. Licha ya kuleta mwamko zaidi kwa wabunifu, jambo hilo linaweza kuwa chachu ya kuhamasisha matumizi ya teknolojia bora miongoni mwa wananchi,” alisema.

Wakati akitembelea maonesho ya wabunifu, Naibu Waziri alimwagiza Mkurugenzi Mkuu wa VETA, Daktari Pancras Bujulu kufanya mazungumzo na taasisi na mamlaka husika ikiwemo  Kampuni ya Reli Tanzania (TRL) kuhusiana na ubunifu wa Mfumo wa Kudhibiti Ajali kwenye Makutano ya Reli na Barabara uliofanywa na Mwalimu Emmanuel Bukuku wa VETA Dar es Salaam na Ubunifu wa Kudhibiti wa Ajali za Pikipiki uliofanywa na Mwalimu Aneth Mganga wa VETA Kipawa ili kuhakikisha kuwa ubunifu unafika katika matumizi halisi kwenye jamii.

Aidha, Mheshimiwa Naibu Waziri Ole Nasha aliagiza kuboresha mchakato wa utaratibu wa kupata wabunifu kutohusisha maandiko ya kitaalam sana, badala yake iwe ni kuwafuata wabunifu na kuwafanyia tathmini huko waliko.

Akitoa maelezo mafupi kuhusu mashindano, Naibu Katibu Mkuu, Wizara ya Elimu, Sayansi na Teknolojia, Prof. James Mdoe, alisema mashindano hayo yamepitia katika mchujo uliohusisha makundi na ngazi mbalimbali kote nchini ukiratibiwa na Wizara kupitia Tume ya Taifa ya Sayansi na Teknolojia (COSTECH); Taasisi ya Teknolojia Dar es salaam (DIT); na Mamlaka ya Elimu na Mafunzo ya Ufundi Stadi (VETA).

“Mchakato wa mashindano hayo ulianza kwa kupokea maombi ya wabunifu na kusajili kuanzia tarehe 10 Januari 2019 hadi 17 Februari 2019. Jumla ya wabunifu 415 walijisajili kutoka: Vyuo Vikuu na taasisi za utafiti (53); Vyuo vya Ufundi Sanifu (27); Vyuo vya Ufundi stadi na Sekta Isiyo Rasmi (262); na Shule za Sekondari (78),” Alisema. 

Alisema, mashindano katika ngazi ya kitaifa yatafanyika kwa siku tatu kuanzia tarehe 5 hadi 7 Machi 2019 na yatahusisha jumla ya wabunifu 60 watakaoonesha ubunifu wao na kufanyiwa tathmini ya mwisho ili kupata washindi watatu bora kutoka kila kundi watakaopewa tuzo siku ya kilele

Alisema wabunifu wanaoshiriki katika fainali za mashindano wamebuni na kutengeneza vitu na mawazo yanayolenga kutatua changamoto mbalimbali katika sekta za afya, TEHAMA, elimu, mifugo, kilimo, nishati, viwanda, mazingira, maji na umwagiliaji, usafirishaji, madini, na maliasili. 

Kilele cha Mashindano hayo ni tarehe 7 Machi, 2019, ambapo Waziri wa Elimu, Sayansi na Teknolojia, Mheshimiwa Prof. Joyce Ndalichako anatarajiwa kufunga na kutoa tuzo kwa washindi tatu bora wa kila kundi.