VETA YAINGIA MAKUBALIANO NA SIKA TANZANIA KUONGEZA UJUZI KWA VIJANA WA CHUO CHA VETA CHANG’OMBE

Mamlaka ya Elimu na mafunzo ya Ufundi Stadi VETA, imeingia makubaliano na kampuni ya SIKA Tanzania Construction Chemicals Ltd hapo tarehe 1/03/2019 ambayo yana lengo la kuwaongezea uwezo walimu na wanafunzi katika kuboresha mitaala ya VETA kwa fani za Ujenzi, mafunzo katika matumizi ya teknolojia mpya, na uboreshwaji wa karakana za kufundishia katika chuo cha VETA Dar es salaam.

Akizungumza wakati wa kusaini makubaliano hayo, Mkurugenzi Mkuu wa VETA DKT.PACRAS BUJULU alisema madhumuni ya kuingia makubaliano hayo na kampuni ya SIKA ni kuweza kuwasaidia vijana ili kuweza kuwaongezea sifa za kuajirika kimataifa na kuweza kutambua teknolojia za kisasa zinazo tumika katika viwanda.

”Makubaliano haya ni muhimu sana kwetu kwa sababu yataweza kuwasaidia vijana kuweza kuongeza wigo wa kujiajiri lakini pia kuweza kutambua teknolojia za kisasa zinazotumika katika viwandani kwa nyakati hizi ambazo teknolojia inakua siku hadi siku"

LEAH DOTO LUKINDO Mkurugenzi VETA kanda ya Dar es salaam alisema makubaliano yaliyofanyika baina ya kampuni ya SIKA pamoja na VETA yatakuwa na manufaa sana kwa VETA hasa tunapoelekea kwenye uchumi wa Viwanda kwani ili kuwa na uchumi imara lazima tuwe na vijana walio na ujuzi unaostaili.

Aidha Mkurugenzi huyo aliongeza kwa kusema kuwa mojawapo ya njia ya kujenga ujuzi unao hitajika kwa vijana ni vizuri kuweka ushirikiano kwa viwanda pamoja na mashirika ambayo yatawasaidia wanafunzi wa VETA pamoja na walimu wake kujua teknolojia inayotumika katika viwanda .

" ushirikiano wa SIKA kama kiwanda kinachohusika na utengenezaji wa bidhaa za ujenzi na Mamlaka ya Elimu na Mafunzo ya Ufundi Stadi VETA utawasaidia vijana wetu kupata fursa ya kujifunza matumizi ya bidhaa za ujenzi zinazozalishwa katika kiwanda hicho kwani Matarajio ya VETA baada ya makubaliano haya ni kuwasaida vijana kuweza kuajirika kwa urahisi na kuweza kujiajiri wenyewe katika soko la Ajira."

Naye Mkuregenzi Mtendaji wa SIKA Tanzania ndugu ALFONSO PARADINAS alisema “tumeona ni muhimu kushirikiana na VETA ili kushiriki katika utoaji na uendelezaji wa elimu kwa kuwafundisha vijana teknolojia ya kisasa ambayo italeta manufaa kwao pindi watakapo ingia kwenye soko la ajira”

aliongeza kwa kusema kuwa madhumuni ya kusaini makubalino hayo ni kuisaidia VETA kwa kuwapatia wataalamu na kuwafundisha walimu wa VETA na baadae walimu hao kuwafundisha wanafunzi wa chuo cha VETA Chang’ombe teknolojia mpya za kampuni hiyo kwa kuwapatia vifaa vya kisasa vya kufundishia katika karakana za sekta ya ujenzi.

Aliongeza kwa kusema kwamba wao watatoa vifaa vya kufundishia katika karakana za Mafunzo ya Ujenzi.

SIKA Tanzania Construction Chemicals LTD ni tawi la kampuni ya Kimataifa ya SIKA GLOBAL iliyoanzia USWIZI zaidi ya miaka 110 iliyopita, kampuni hii ina matawi zaidi ya 100 duniani ikiwemo 18 katika bara la africa pekee. Nchini Tanzania kampuni hii imeanza mwaka 2015 na imefanikiwa kufungua kiwanda cha uzalishaji wa kemikali za aina zote zinazotumika kwenye zege (concrete mixture dio admixture).