Simanjiro waikabidhi VETA chuo cha ufundi stadi

Katika hali inayoashiria nia ya dhati ya  kuendeleza ujuzi, Halmashauri ya Wilaya ya Simanjiro mkoani Manyara imekabidhi majengo na miundombinu mbalimbali ya chuo cha ufundi stadi Simanjiro kwa Mamlaka ya Elimu na Mafunzo ya Ufundi Stadi (VETA) ili kukiendesha na kukisimamia.

Makabidhiano hayo yamefanyika tarehe 12 Machi 2019 katika kijiji cha Emboreet, kata ya Emboreet na kutiwa saini na Mkurugenzi Mtendaji wa Halmashauri ya Wilaya ya Simanjiro, Yefred Myenzi na Mwenyekiti wa Halmashauri ya Wilaya hiyo, Jackson Sipitieck kwa upande mmoja na Mkurugenzi Mkuu wa VETA, Dkt. Pancras Bujulu kwa upande mwingine. 

Makabidhiano hayo yamehusisha majengo yaliyokamilika yakiwemo madarasa matano; nyumba ya mwalimu (Two in one); hosteli yenye uwezo wa kubeba wanafunzi 48; miundombinu ya maji safi  ikihusisha kisima kirefu kinachoendeshwa kwa umeme wa jua; matanki yenye ujazo wa lita 20,000; pamoja na pampu inayosukuma maji kwa nguvu za umeme wa jua ikiwa na uwezo wa kujaza lita 6000 kwa saa.

Ujenzi wa karakana na ununuzi wa vifaa vya kufundishia kozi ya awali ambayo ni Uashi unaendelea kwa msaada wa Asasi ya ECLAT Foundation ya Simanjiro na Upendo ya Ujerumani. 

Wakati ikikabidhi majengo na miundombinu hiyo, Halmashauri ya Simanjiro inaendelea na taratibu za kuomba hati miliki ya eneo la ukubwa wa ekari 104 ambalo miundombinu hiyo imo ili hatimaye nayo iikabidhi kwa VETA, hivyo kuwezesha upanuzi shughuli mbalimbali za utoaji mafunzo.

Mkurugenzi Mkuu wa VETA Dkt. Pancras Bujulu aliwashukuru wananchi wa kata ya Emboreet kwa mwamko waliouonesha katika kutambua na kuthamini elimu na mafunzo ya ufundi stadi. 

Katika kuonesha VETA kuunga mkono juhudi za wananchi wa wilaya hiyo, Dkt. Bujulu aliahidi kujenga bweni moja la wavulana lenye uwezo wa kulaza wanafunzi 48 ili bweni lililopo (ambalo nalo linaweza kulaza wanafunzi 48) litumike kwa wanafunzi wa kike. 

Hati ya makabidhiano ya eneo hilo imefafanua kuwa Halmashauri ya Simanjiro imejielekeza katika kuwajengea vijana wahitimu ujuzi na ufundi stadi ii waweze kujiajiri na kwenda sambamba na kasi ya maendeleo ya serikali ya Tanzania. 

“Malengo ya makubaliano haya kati ya Halmashauri na VETA ni kuendeleza viwango vya mafunzo ya ufundi stadi na utoaji elimu kuzingatia viwango vya kitaifa,” inafafanua sehemu ya Hati hiyo.