Ole Nasha asisitiza ubora kwenye utoaji mafunzo ya Ufundi Stadi

Naibu Waziri wa Elimu, Sayansi na Teknolojia William Ole Nasha ameiagiza Mamlaka ya Elimu na Mafunzo ya Ufundi Stadi (VETA) kuboresha usimamizi na uthibiti wa vyuo vinavyotoa elimu ya Ufundi Stadi nchini ili kuzalisha mafundi wenye ubora.

Akizungumza wakati wa ziara yake katika ofisi za VETA Makao Makuu jijini Dar es Salaam Jumanne tarehe 16 Oktoba   2018, Ole Nasha alisema elimu ya ufundi stadi inategemewa sana katika kutekeleza azma ya serikali ya kufikia uchumi wa kati kupitia viwanda hivyo kuna umuhimu mkubwa wa kuboresha usimamizi wa vyuo vinavyotoa elimu hiyo.

Aliagiza uhakiki ufanyike katika vyuo vyote nchini ili kubaini vyuo ambavyo vinatoa mafunzo bila kufuata kanuni na sheria za utoaji mafunzo na hatua za kisheria ikiwemo kufungia vyuo hivyo zichukuliwe.

“Naagiza vyuo vyote vinavyotoa elimu ya ufundi stadi kuhakikisha vina usajili na ithibati… Hatuwezi kuwa na elimu bora kama hatuna vyuo vyenye ubora vitakavyozalisha nguvu kazi bobezi ya uchumi wa viwanda” Alisema

Ole Nasha aliitaka VETA pia kupitia mara kwa mara mitaala ya kufundishia ili kuhakikisha mafunzo yanayotolewa yanaendana na mahitaji ya soko kwa wakati husika.

Katika hatua nyingine, Ole Nasha aliipongeza VETA kwa jitihada ilizoanza kuzichukua katika kusimamia utekelezaji wa miradi mbalimbali hasa ya ujenzi wa vyuo vya Mikoa na Wilaya na kuitaka kutosita kusitisha mkataba na Mkandarasi atakayeenda kinyume na makubaliano ya mkataba.

Awali, Mwenyekiti wa Bodi ya Elimu na Mafunzo ya Ufundi Stadi Peter Maduki alisema VETA inaendelea na jitihada za kupaua wigo wa utoaji mafunzo kupitia ujenzi wa vyuo vya Mikoa na Wilaya lengo likiwa kuhakikisha idadi ya udahili inaongezeka kutoka 200,000 hadi 700,000 ifikapo mwaka 2020.

Naye Mkurugenzi Mkuu wa VETA Dkt. Pancras Bujulu alisema kuwa Mamlaka hiyo itaendelea kubuni mbinu mbalimbali za kuhakikisha elimu ya ufundi stadi inafikia watanzania wengi zaidi kwa ubora unaokubalika.

Alisema Mamlaka hiyo inatambua wajibu mkubwa iliyonayo katika kuandaa nguvu kazi yenye stadi mahiri ili kushiriki kikamilifu katika kujenga uchumi wa viwanda.

Katika ziara hiyo, Naibu Waziri alikutana na wafanyakazi wa VETA na kuwasisitiza uwajibikaji na uadilifu katika kutekeleza majukumu yao