Mkurugenzi Mkuu VETA asisitiza utoaji huduma bora

Mkurugenzi Mkuu wa VETA Dkt. Pancras Bujulu amewataka wafanyakazi wa Mamlaka ya Elimu na Mafunzo ya Ufundi Stadi (VETA) kuboresha zaidi utoaji huduma ili kuhakikisha Mamlaka inaendelea kuaminika na kuwa na taswira njema mbele za umma.
 

Dkt. Bujulu alisema hayo Septemba 7 alipokuwa akifunga rasmi warsha ya kuwajengea uwezo makatibu muhtasi, makatibu waendesha ofisi, watunza kumbukumbu na watumishi wa mapokezi juu ya uboreshaji huduma kwa wateja iliyofanyika katika Chuo cha Walimu wa Ufundi Stadi (MVTTC), mkoani Morogoro.

Alisema wateja wanategemea kupata huduma bora kutoka kwa Mamlaka na wana haki ya kuzipata kwa viwango bora.

Aliwataka wafanyakazi wa VETA kuchangamkia fursa mbalimbali za kujiendeleza kielimu ili waweze kuongeza ufanisi wa utendaji kazi katika kada zao na kusisitiza kuwa Mamlaka itaendelea kuhakikisha upatikanaji wa fursa hizo kwa usawa kwa wafanyakazi wake.

“Mnapopata fursa za masomo sehemu mbalimbali tafadhali zichangamkieni kwa kuwa elimu itawasaidia kuboresha utendaji wenu na hata kuwawezesha kukua katika muundo na kupandishwa mishahara na vyeo”. Alisema.

Warsha hiyo ilifanyika kwa siku mbili, tarehe 6 na 7 Septemba 2019 iliwajumuisha makatibu muhtasi, makatibu waendesha ofisi, watunza kumbukumbu na watumishi wa mapokezi 30 kutoka ofisi ya VETA Makao makuu, vyuo na ofisi za kanda. 

Katika warsha hiyo, mada mbalimbali zilitolewa ikiwemo mbinu za Kuboresha Huduma kwa Mteja, Uandaaji na Usimamizi wa Shughuli, Itifaki na kushirikishwa baadhi ya miongozo iliyoandaliwa siku za karibuni ikiwemo Mkataba wa Huduma kwa Wateja na Mwongozo juu ya Mwonekano wa Mamlaka (Branding Guidelines) inayolenga kuboresha utoaji huduma kwa wateja.