MAHAFALI YA NANE YA CHUO CHA VETA KIPAWA

Wahitimu wa VETA wasisitizwa kutumia TEHAMA kujiajiri

Mkurugenzi Mkuu wa Tume ya Taifa ya Teknolojia ya Habari na Mawasiliano (Tehama) Mhandisi Samson Mwela amewataka wahitimu wa VETA kuitumia vyema taaluma ya Tehama kujiajiri.

Akizungumza katika Mahafali ya Chuo cha VETA Kipawa Novemba 22,2019. Mhandisi Mwela amesema kuwa Serikali imewekeza sana katika miundombinu ya Tehama ambapo asilimia 94 ya maeneo yanayokaliwa na watu yamefikiwa na miundombinu ya mawasiliano.

Amesema kuwa vijana waliohitimu katika Chuo hicho ambacho kinaendesha kozi ya Tehama wana fursa za kujiajiri kutokana na Mazingira wezeshi ya Serikali katika miundombinu.

Amewataka vijana kuchangamkia fursa hizo hasa kwa kuzingatia kuwa fursa kwenye sekta hiyo hazihitaji mtaji mkubwa kuweza kujiajiri na kuwasisitiza kuwa waadilifu katika kazi zao ili kuepuka Uhalifu kwa kutumia Tehama.

Naye Kamanda wa Polisi Kikosi cha Usalama Barabani nchini Fortunatus Muslim alisema maendeleo ya Tehama duniani yanagusa kila sekta na kwamba wahitimu hao wanaweza kutumia fursa hiyo kutengeneza mifumo mbalimbali ya kurahisisha uendeshaji wa shughuli mbalimbali.

Aliwakaribisha wanafunzi kutembelea Jeshi la Polisi na kujionea mifumo mbalimbali inayotumiwa na jeshi hilo na namna mifumo hiyo ilivyorahisisha uendeshaji wa shughuli mbalimbali.

Mkuu wa Chuo cha VETA Kipawa Dickson Mkasanga amesema kuwa Chuo hicho kinaendelea kufanya tafiti na bunifu mbalimbali zinazolenga kutatua changamoto zinazoikabili jamii pamoja na kuchangia katika uchumi wa viwanda.

Amesema jumla ya vijana 122 wamehitimu mafunzo chuoni hapo katika fani za Tehama, Elektroniki na Kompyuta kwa ngazi za Ufundi Stadi Daraja la pili, Daraja la Tatu, Stashahada pamoja na kozi za muda mfupi huku chuo hicho kikiwa na uwezo wa kudahili wanafunzi 250 wa kozi ndefu na 1,800 wa kozi fupi kwa mwaka.