Wajerumani Waridhishwa na Uendeshaji wa Mafunzo ya Uanagenzi Yanayotolewa na VETA.

 Mradi wa Mafunzo ya Uanagenzi Pacha (Dual Apprenticeship Training System) unaoendeshwa kwa ushirikiano kati ya Mamlaka ya Elimu na Mafunzo ya Ufundi Stadi (VETA) na Taasisi ya Kijerumani ya “West German Skills Craft (WHKT)” umebainisha mafanikio.

Mradi huo unahusisha utoaji mafunzo katika fani ya Ufundi wa Zana za Kilimo (Agro-Mechanics) katika chuo cha mafunzo ya ufundi na huduma cha Mkoa wa Manyara (Manyara RVTSC) ulioanza mwezi Agosti, 2017 na unatarajiwa kumalizika Machi, 2020.                                                                                                                                                                                                    Kiongozi wa Timu kutoka Ujerumani inayofuatilia na kutathmini mradi huo Herman Roder alisema kuwa mradi huo umefanikisha kutoa matokeo yaliyotarajiwa. Bwana Roder alibainisha kuwa timu hiyo imeridhishwa na hatua zilizofikiwa katika kutekeleza mradi huo ambapo masuala yaliyozingatiwa katika tathmini ni pamoja na Umuhimu wa mradi (relevance), Ufanisi katika utekelezaji (effectiveness), Upatikanaji wa matokeo tarajiwa (efficiency) na Uendelevu wa mradi (sustainability).

Maelezo hayo yalitolewa wakati Timu hiyo ilipokutana na Uongozi wa VETA wakati wa kupokea mrejesho wa Ufuatiliaji na Tathmini ya utekelezaji wa mradi huo katika ofisi za VETA Makao Makuu, tarehe 4 Novemba, 2019.

Baada ya kupokea taarifa hiyo, Mkurugenzi Mkuu wa VETA, Dkt. Pancras Bujulu alisema kuwa VETA itaendelea kushiriki kikamilifu katika utekelezaji wa mradi huo, kwani unatoa mafunzo mahali pa kazi na hivyo kuandaa nguvukazi yenye kukidhi mahitaji ya soko la ajira.

Dkt. Bujulu aliwahakikishia wajumbe wa Timu hiyo kuwa VETA itafanya jitihada za kueneza utaratibu wa mafunzo ya Uanagenzi wa Zana za Kilimo katika vyuo vingine vya Ufundi Stadi vya Arusha, Kihonda, Dakawa na Mpanda.

Mbunge wa Jimbo la Babati Vijijini, Mhe. Jitu Son, alishiriki katika kikao hicho ambapo alikiri kuwa mfumo wa mafunzo ya uanagenzi umekuwa wa manufaa kwa wananchi wa Jimbo lake na Mkoa wa Manyara kwa ujumla. Mhe. Jitu Son aliishauri VETA kushirikisha wadau wengi zaidi ili utaalam wa utunzaji na matumizi ya zana za kilimo uweze kuenea kwa wakulima wengi zaidi na kuongeza tija katika Sekta ya Kilimo.

Timu hiyo pia ilibainisha utayari wa kuendelea na awamu ya pili ya mradi huo kwa miaka mitatu kuanzia Aprili, 2020 huku ikifurahishwa na ushirikiano unaotolewa na VETA katika utekelezaji wa mradi huo, ikiwa ni pamoja na utayari wa kugharamia baadhi ya shughuli za mradi.

Mafanikio yaliyotokana na utekelezaji wa mradi huo ni pamoja na mafunzo kwa walimu na wakulima, ambapo jumla ya walimu 25 na wakulima 15 walipatiwa mafunzo katika kozi za uchomeleaji na uungaji vyuma na mbinu za ufundishaji kozi za Kilimo. Walimu hao walitoka katika vyuo vya VETA Songea, VETA Mpanda, VETA Dar es Salaam, VETA Arusha, VETA Kihonda, VETA Manyara na Chuo cha Ufundi Stadi Kilacha. Vilevile, kupitia mradi huo jumla ya wanagenzi 26 walidahiliwa mwezi Februari, 2019 na wanaendelea na mafunzo katika fani ya Ufundi wa Zana za Kilimo.       

Pamoja na mafunzo ya Uanagenzi, wananchi wa Babati Vijijini wamepata fursa za kujifunza juu ya matumizi na utunzaji wa zana ya kilimo pamoja na mbinu za kuzuia upotevu wa mazao baada ya mavuno (Prevention of Post-harvest Losses).

Mfumo wa utoaji mafunzo ya Uanagenzi unahusisha kuhudhuria mafunzo ya darasani (VETA) na kufanya vitendo katika viwanda na mashamba au sehemu nyingine za kazi. Mafunzo hayo ni ya miaka mitatu ambapo kwa kila mwaka mwanagenzi anatumia wiki 20 kwa mafunzo ya darasani na wiki 32 kwa mafunzo ya viwandani.