Mhe. Jerry Muro awahamasisha vijana kuchangamkia fursa kwenye sekta ya Utalii

Mkuu wa Wilaya ya Arumeru Mhe. Jerry Muro amewataka wahitimu wa Chuo cha VETA cha Mafunzo ya Hoteli na Utalii kuchangamkia fursa zinazotokana na kukua kwa sekta ya utalii nchini.

Mhe. Muro aliyasema hayo katika Mahafali ya saba ya Chuo hicho yaliyofanyika Novemba 29, 2019 Njiro, jijini Arusha ambapo jumla ya vijana 89 walihitimu katika ngazi za Astashahada na Stashahada katika kozi za hoteli na Utalii.

Alisema sekta ya Utalii inazidi kukua siku hadi siku kutokana na uwekezaji mkubwa unaofanywa na Serikali ya awamu ya tano inayoongozwa na Mhe. Rais Dkt. John Pombe Magufuli hasa katika kuboresha miundombinu kama vile ujenzi wa viwanja vya ndege na ununuzi wa ndege mpya pamoja na ujenzi wa barabara.

“Utalii unakua na kuongezeka kwa kasi kubwa sana ambapo zamani tulitegemea zaidi watalii kutoka nchi za Ulaya na Marekani  lakini kwa sasa tunashuhudia watalii kutoka nchi za Asia kama vile China na India wakija nchini kwa wingi ambapo mahitaji ya huduma katika sekta hiyo yanazidi kuvutia wawekezaji wakubwa na wadogo… hizi ni fursa kwa wahitimu wetu hivyo zichangamkieni” Alisema

Aliishauri VETA kuongeza udahili katika kozi za ukarimu na utalii ili kuzalisha nguvukazi ya kutosha kuhudumia sekta hiyo inayokuwa kwa kasi na kuandaa mafunzo ya muda mfupi kwa madereva na waongoza watalii ambao hawajapitia mafunzo maalum ili waweze kuendesha shughuli zao kwa viwango vinavyokubalika kimataifa.

Awali, Mkuu wa Chuo cha VETA Njiro Christopher Ayo alisema kuwacasilimia tisini na nne (94%) ya wahitimu hao wameshaajiriwa na kuongeza kuwa takwimu hizo ni ushahidi wa ubora wa mafunzo yanayotolewa na chuo hicho na juhudi za kuunga mkono dira ya nchi ya kujenga uchumi wa viwanda.

Alisema chuo hicho chenye usajili na ithibati ya Baraza la Elimu ya Ufundi yaani NACTE kimekua kikitoa mafunzo katika kozi za mapokezi na huduma za malazi (Rooms Division), huduma na mauzo ya chakula na vinywaji (Food and Beverage Services and Sales) na  sanaa ya uandaaji na mapishi (Culinary Art) katika ngazi ya Astashahada na Stashahada.

Aidha Chuo hicho kimeanza rasmi kutoa mafunzo ya muda mrefu katika kozi za uongazaji watalii (Tour Guide) kwa ngazi ya Astashahada na usimamizi wa uendeshaji shughuli za watalii (Travel and Tour Operations) kwa ngazi ya Stashahada ambazo zitaendeshwa kwa muda wa miaka miwili.

Ayo alitaja baadhi ya mipango ya chuo hicho kuwa ni pamoja na kuongeza udahili hadi kufika wanachuo mia tano (500) kwa mwaka kutoka mia tatu (300) wa sasa, kuongeza ushirikiano na vyuo na taasisi mbalimbali ndani na nje ya nchi zinazotoa mafunzo ya hoteli na utalii na kuanzisha masomo kwa njia ya mtandao (E-learning) hasa kwa wahitaji walio mbali na chuo wanaotaka kujiendeleza.

Ayo alisema chuo kinatoa mafunzo ya muda mfupi katika fani mbalimbali kama Upambaji, Usafi wa majengo na maeneo ya wazi, Upishi, Huduma ya uuzaji vinywaji, uandaaji wa keki na mafunzo ya uongozaji watalii.